Poslovne vesti - Makedonija

Светската банка додели грантови за одржлив развој

Пет невладини организации добија грантови во висина од 5.000 до 10.000 долари од Светската банка како поддршка за проекти од одржливиот развој и енергетската ефикасност.

Средствата се доделуваат од Фондот за цивилно општество и за нив аплицирале околу 40 организации, а избрани се Регионалниот центар за одржлив развој од Кратово, Здружението на граѓани „Сумнал“ од Скопје, Центарот за економски анализи, Фондацијата за ново образование за бизнис од Скопје и Здружението за локален и рурален развој од Камењане.

- Целта на овогодишната програма е давање поддршка за поеколошки развој и енергетска ефикасност - истакна Лилија Буручук од Канцеларијата на Светската банка во Скопје, каде што вчера беа потпишани договорите со невладините организации.

Досега Светската банка има инвестирано во Македонија над една милијарда долари во заеми и грантови.

Средствата се искористени во разни сектори во економијата, а како позначајни се финансиската поддршка во реконструкцијата на над 200 километри патишта, на инфраструктурата за наводнување и на реформирањето на образованието.